काठमाडौं– अख्तियार दुरुपयोग अनुसन्धान आयोगले जिल्ला अदालत कास्कीका श्रेस्तेदार लोकनाथ पराजुलीविरुद्ध भ्रष्टाचार मुद्दा दायर गरेको छ ।

अदालतमा विचाराधी मुद्दामा नियन्त्रणमा लिइएको गाडी छुटाइदिने बहानामा लिएको ३० हजार रुपैयाँ घुससहित पक्राउ परेका पराजुलीविरुद्ध आइतबार विशेष अदालतमा मुद्दा दायर गरिएको अख्तियारका केन्द्रीय प्रवक्ता प्रदीप कुमार कोइरालाले जानकारी दिएका छन् ।

संगठित अपराध, कर्तव्य जान मुद्दामा दशी प्रमाणको रुपमा जिल्ला अदालत कास्कीमा पेश भएको ग १ च नम्बरको कार अदालतको आदेश बमोजिम छुटिसकेको अवस्थामा पराजुलीले भने धरौटी निर्धारण गरी गाडी छाडिदिने भन्दै ३० हजार रुपैयाँ घुस लिएका थिए ।

अख्तियारले पराजुलीविरुद्ध ३० हजार रुपैयाँ बिगो तथा बिगो अनुसार जरिवाना र ४ महिनासम्म कैद सजाय मागदाबी गरेको छ ।