काठमाडौं –  रुसमा एक सातादेखि दैनिक १० हजारभन्दा बढी मानिस कोरोना भाइरसबाट संक्रमित भएका छन् ।

शनिबार पनि १० हजार ८१७ जना संक्रमित भएपछि रूसमा एक हप्तामा कोरोना भाइरसले संक्रमित हुनेको संख्या ७५ हजार पुगेको छ ।

रुसमा शुक्रबार १० हजार ६९९ जना र बिहिबार ११ हजार २३१ जना संक्रमित भएका थिए । त्यसअघि पनि दैनिक १० हजारभन्दा बढी संक्रमित भएका थिए ।

यो समाचार तयार पार्दासम्म रुसमा कुल संक्रमितको संख्या १ लाख ९८ हजार ६७६ पुगेको छ ।

पछिल्लो २४ घण्टामा थप १०४ जनाको मृत्यु भएको छ । योसँगै कुल मृतकको संख्या १ हजार ८२७ पुगेको छ ।

संक्रमितमध्ये ३१ हजार ९१६ जना निको भएर घर फर्किएका छन् भने १ लाख ६४ हजार ९३३ जनाको उपचार जारी छ ।