भारत- भारतमा कोभिड–१९ संक्रमितको स्वास्थ्यलाभ दर ३० प्रतिशत मापन गरिएको छ ।

केन्द्रीय स्वास्थ्य तथा जनकल्याण मन्त्री डा. हर्षवर्द्धनले भारतमा कोरोना संक्रमित निको हुने दर ३० प्रतिशतको हाराहारीमा रहेको बताएका हुन् ।

नयाँ दिल्लीमा सञ्चारकर्मीहरुसँगको कुराकानीमा मन्त्री हर्षवर्द्धनले आइतबारसम्म कोभिड–१९ को संक्रमण मृतकको संख्या २ हजार १०१ पुगेको जनाएका छन् ।

भारतमा एकैदिन थप ३ हजार ११३ जनामा संक्रमण देखिएसँगै संक्रमित हुनेको संख्या ६२ हजार ८०८ पुगेको छ ।

भारतमा संक्रमितमध्ये १९ हजार ३०१ जना उपचारपछि निको भएका छन् । ४१ हजार ४०६ जनाको विभिन्न अस्पतालमा उपचार भइरहेको छ ।

भारतमा कोभिड–१९ संक्रमितको मृत्युदर ३.३ प्रतिशत मापन गरिएको छ । स्वास्थ्यलाभ दर २९.९ प्रतिशत पुगेको छ ।

भारतमा कोरोना संक्रमितको उपचारका लागि ८४३ अस्पतालमा एक लाख ६५ हजार ९९१ शैय्याको व्यवस्थापन गरिएको छ । त्यस अतिरिक्त एक हजार ९९१ स्वास्थ्य केन्द्रमा आईसीयू र आइसालेशन सुविधासहितको एक लाख ३५ हजार ६४३ शैय्या तयारी अवस्थामा रहेको उनले जानकारी दिए ।

भारतको सबै राज्यमा गरी ३२ लाख ७६ हजार व्यक्तिगत सुरक्षा उपकरण वितरण गरिएको छ ।