सोल– यतिबेला विश्वभर कोरोना भाइरसको त्रास छ । विश्वका सबै मुलुकहरुले कोरोना भाइरस रोकथाम तथा नियन्त्रण गर्ने प्रयास गरिरहेका छन् ।

तर, उत्तर कोरियाका सर्वोच्च नेता किम जोङ उनलाई भने कोरोना भाइरसदेखि डरै छैन ।

उत्तर कोरियाको सरकारी समाचार संस्था केसीएनएले हालै सार्वजनिक गरेको किमको तस्बीरमा उनलाई मास्कबिनै देखिएको छ । तर, उनको साथमा तस्बीरमा देखिएका सैनिकले भने मास्क लगाएका छन् ।

उत्तर कोरियाले अहिले सैनिक अभ्यास गरिरहेको छ । यसैक्रममा केसीएनएले किमको तस्वीर सार्वजनिक गरेको हो ।

कोरोना भाइरस शुरु भएको चीनसँग सीमा जोडिएको भएपनि उत्तर कोरियाले मुलुकमा यसको कुनै संक्रमण देखा नपरेको दाबी गर्दै आएको छ ।

यद्यपि यसअघि कोरोनाको क्वारेन्टाइनबाट भागेको आरोपमा एकजनालाई उत्तर कोरियामा मृत्युदण्ड दिइएको समाचार सार्वजनिक भएको थियो ।