जावलाखेल– नेपाल सरकारका सेवा निवृत्त एकजना सचिवकी श्रीमतीको ललितपुरमा हत्या *प्रयास  भएको छ ।

सेवा निवृत्त सचिव अर्जुन कार्कीको श्रीमतीको हत्या गर्ने उद्देश्यले आक्रमण भएको र अचेत अवस्थामा फेला पारी उपचारका लागि अस्पताल पठाइएको ललितपुर प्रहरीले जनाएको छ ।

महानगरीय प्रहरी परिसर ललितपुरकी प्रहरी उपरीक्षक दूर्गा सिंहले कार्कीकी श्रीमती मुना कार्कीलाई सानेपास्थित आफ्नै निवासमा रगतले लतपतिएको अवस्थामा फेला पारिएको बताइन् ।

यस्तै, घरमा काम गर्ने एकजना कामदारको पनि झुन्डिएको अवस्थामा शव फेला परेको एसपी सिंहले खबरहबलाई जानकारी दिइन् ।

‘पूर्वसचिव कार्की ज्यूकी श्रीमतीको हत्या *प्रयास भएको भन्ने सूचना आएपछि प्रहरीको टोली त्यहाँ पुगेको छ । अहिले घटनाको विषयमा अनुसन्धान चलिरहेको छ,’ एसपी सिंहले खबरहबसँग भनिन्, ‘घरमा काम गर्ने कामदार (विजय चौधरी)को पनि झुन्डिएको अवस्थामा शव फेला परेको छ ।’

घटनास्थलमा पुगेको प्रहरी टोलीलाई पूर्व सचिव कार्कीले आफू बिहान पूजाका लागि पशुपतिनाथ गएको र फर्केर आउँदा दुवै जनालाई विभत्स अवस्था भेटेको बताएका छन् ।

घटनाको विषयमा महानगरीय प्रहरी परिसर ललितपुर र महानगरीय अपराध महाशाखाको टोलीले संयुक्त रुपमा अनुसन्धान थालेको छ ।

*महानगरीय प्रहरी परिसर ललितपुरले यसअघि घटनाको सम्बन्धमा दिएको जानकारीका कारण समाचारमा उल्लेखित विषयमा केही त्रुटी हुन गएकोमा सच्याइएको छ– सम्पादक