काठमाडौं – अमेरिकी राष्ट्रपति डोनाल्ड ट्रम्पले हालै भएको राष्ट्रपतीय निर्वाचनमा हार बेहोरेपछि उनी आबद्ध रिपब्लिक पार्टीमा विवाद उत्पन्न भएको छ ।

ट्रम्पले चुनावमा धाँधली भएको आरोप लगाएका छन् भने रिपब्लिकन पार्टीका केही ठूला नेताहरूले पनि ट्रम्पको हार स्वीकारेका छैनन् ।

यता पार्टीका नेता एवम् पूर्वराष्ट्रपति जर्ज डब्ल्यू बुसले राष्ट्रपतिमा चुनिएका जो बाइडनलाई बधाई दिँदै चुनाव निष्पक्ष भएको प्रतिक्रिया दिएका छन् । उनको बधाईले पार्टीभित्र मतभेद देखिएको छ ।

हाउस अफ रिप्रेजेन्टेटीभका पार्टी नेता केविन म्याक्कर्थीले हरेक कानूनी चुनौतीमाथि विचार गर्नुपर्ने धारणा राखेका छन् ।

राष्ट्रपति ट्रम्पले धाँधली भएको भन्दै चुनावी परिणाम चोरिएको समेत आरोप लगाएका छन् । उनले आफूले जितेको पनि सामाजिक सञ्जालमार्फत दाबी गरेका छन् । फेसबूक र ट्वीटरले ट्रम्पका पोस्टहरूलाई मोनिटर गरिरहेको छ र ट्रम्पले दाबी गरेका पोस्टसँगै बाइडेनले चुनाव जितेको पनि सूचना सम्प्रेषण गरेको छ ।

‘यी मानिस चोर हुन् भन्ने हामी ठान्छौं, यो एक चोर लागेको चुनाव हो,’ ट्रम्पले एक ट्वीटमा भनेका छन् ।