काठमाडौँ- नेपाली कांग्रेसका नेता प्रकाशमान सिंहले केपी ओली नेतृत्वको वर्तमान सरकार अस्थीरता निम्त्याउन र भ्रष्टाचार गर्नमा केन्द्रित भएको आरोप लगाएका छन् ।

कोरोना संक्रमणको महामारीको बेला पनि औषधि उपकरण खरिदमा भ्रष्टाचार गरेको र लकडाउनका कारण समस्यामा परेकाहरुलाई निःशुल्क खाना खुवाउँदा पनि अवरोध पुर्‍याएको भन्दै उनले सरकारको आलोचना गरे ।

‘कोरोनाको महामारी छ, सरकार न्यूनतम कामसमेत हामी गर्न सक्दैनौं भनेर पछि हट्दै गइरहेको छ,’ सिंहले भने, ‘यो संकटको समयमा न्यूनतम कामसमेत सरकारले नगर्दा जनता अत्यन्तै दुःखी भएका छन् ।’

गणेशमान सिंहको १०६औं जन्मजयन्तीको अवसरमा आज बिहान काठमाडौंमा भएको कार्यक्रममा नेता सिंहले भने, ‘दुई तिहाइको बहुमत पाएको नेपाल कम्युनिष्ट पार्टीको सरकारले अस्थीरताबाहेक के दिन सकेको छ ? ‘

पहिले संविधान जारी गर्ने म्यान्डेड दिँदा कम्युनिष्टहरूकै सरकारले  संविधानसभा भंग गराएको स्मरण गर्दै सिंहले भने,’अहिले पनि संघीयता, लोकतन्त्र र गणतन्त्रलाई संस्थागत गर्ने म्यान्डेडअनुसार नेकपा अगाडि बढिरहेको छैन ।’

‘बालुवाटार जग्गा काण्ड, सेक्युरिटी प्रिन्टिङ प्रेस लगायतमा भ्रष्टाचारै भ्रष्टाचार गरिरहेको छ । प्रधानमन्त्रीले भ्रष्टाचारीको मुख हेर्दिनँ भन्नुहुन्छ तर उहाँहरुकै पार्टीका नेताहरु संलग्न भएको घोटालामा उहाँले के गर्नु भएको छ ?’ उनले प्रश्न गरे, ‘हामीले स्थीर सरकार दिन्छौं भन्नु भएको थियो, अहिले ११, १२ पटकसम्म मन्त्रिपरिषद हेरफेर भयो, के स्थीरता यही हो ?’

काठमाडौं क्षेत्र नम्बर १ बाट निर्वाचित प्रतिनिधिसभा सदस्यसमेत रहेका नेता सिंहले आजै बिहान ललितपुरको महालक्ष्मीस्थानमा अवस्थित गणेशमान सिंह अस्पताल पुगेर आफ्नो एक महिना बराबरको तलब अस्पताललाई दिएका छन् । हस्पिटलले आजबाटै कोरोना उपचार तथा परीक्षण सुरु गरेको छ ।