काठमाडौं– देश फिर्तीको माग गर्दै शुक्रबार सिंहदरबार अगाडी प्रदर्शनमा उत्रिएका चार चिनियाँ नागरिकमाथि प्रहरीले अभद्र व्यवहारको मुद्दा चलाउने भएको छ ।

शुक्रबार प्रदर्शनका क्रममा उनीहरु प्रहरीमाथि जाइलागेका थिए ।

पक्राउ परेका ४७ जनामध्ये ४२ जनालाई शुक्रवार राति नै छोडिएको महानगरीय प्रहरी परिसर काठमाडौंका एसपी सोमेन्द्र राठोरले जानकारी दिए ।

प्रहरीमाथि हातपात गरिएका कारण चार जनामाथि अभद्र व्यवहारको मुद्दा चलाउने तयारी गरिएको उनले बताए ।

निषेधित क्षेत्रमा प्रदर्शनमा उत्रिएका चिनियाँ नागरिकलाई हटाउन खोज्दा उनीहरु प्रहरीमाथि जाइलागेका थिए ।

प्रहरीको बर्दी तान्ने र हातपाता उत्रिएका उनीहरुलाई प्रहरीले नियन्त्रणमा लिएको थियो । त्यस क्रममा भएको झडपमा परी केही चिनियाँ सहित प्रहरी अधिकारीसमेत घाइते भएका थिए ।

झडपमा महानगरीय प्रहरी वृत्त सिंहदरबारका डिएसपी हरि बस्नेतको टाउकोमा चोट लागेको थियो।