काठमाडौं – लकडाउनका कारण काठमाडौं उपत्यकामा अड्किए सर्वसाधारणलाई दुई दिन गाउँ जान दिने निर्णयको सत्तारुढ दलकै नेतासमेत रहेका प्रदेश पाँचका मुख्यमन्त्रीले विरोध गरेका छन् ।

विहीवार कोरोना भाइरस रोग रोकथाम तथा नियन्त्रण उच्च स्तरीय समितिले उपत्यकामा रहेकालाई दुई दिन आ आफ्नो गाउँ जान दिने निर्णय गरेको थियो ।

र प्रदेश पाँचका मुख्यमन्त्री समेत रहेका नेकपाका नेता शंकर पोखरेलले भने उक्त निर्णयको विरोध गर्दै काठमाडौंबाट बाहिरिन दिने तर भित्रन नदिने कुरामा सत्यता नभहोला भन्दै प्रश्न गरेका छन् ।

मुख्यमन्त्री पोखरेलले लकडाउन भनेको लकडाउन नै रहेको भन्दै यताउति गर्न नमिल्ने बरु समस्यामा परेकालाई राहत दिनुपर्ने बताएका हुन् ।
सामाजिक सञ्जालमा मुख्यमन्त्री पोखरेलले लेखेका छन्,’ काठमाडौंबाट बाहिर जानदिने र बाहिरबाट काठमाडौं जान नदिनेकुरा सत्य होइन होला । लकडाउनको अर्थ लकडाउन हो । वरु बेखर्चीलाई राहत देउ ।’

मुख्यमन्त्री पोखरेलले अगाडि लेखेका छन्,’ प्रदेश पाँचमा जो जहाँ छौं त्यही बसौं, समस्या भए वडा कार्यालयमा सम्पर्क राखौं । ३ गतेपछि सिमित मात्रामा ठाउँहेरी आउजाउ खोल्न सकिन्छ । धैर्य गरौं ।’