काठमाडौं– दोस्रो पटक मिर्गौला प्रत्यारोपण गरेपछि चिकित्सकको निगरानीमा रहेका प्रधानमन्त्री केपी शर्मा ओलीको स्वास्थ्यमा क्रमिक सुधार आइरहेको जनाइएको छ ।

मिर्गौला प्रत्यारोपण गरेको छैठौं दिन (सोमबार) एक विज्ञप्ती जारी गर्दै त्रिवि शिक्षण अस्पतालले प्रधानमन्त्री ओलीको स्वास्थ्यमा सन्तोषजनक सुधार आइरहेको जनाएको हो ।

अस्पतालले जारी गरेको विज्ञप्तीमा जनाइएअनुसार प्रधानमन्त्री ओलीको अहिले नियमित खानपानसँगै हिँडडुल र व्यायामलाई निरन्तरता दिइएको छ ।

अस्पतालले प्रधानमन्त्री ओलीको स्वास्थ्यमा सुधार आउँदै गएका कारण छिट्टै डिस्चार्ज हुने जनाएको छ ।

प्रधानमन्त्री ओलीका प्रेस सल्लाहकार सूर्य थापाले बुधबारसम्म प्रधानमन्त्री ओलीलाई अस्पतालबाट डिस्चार्ज गरी सरकारी निवास सारिने सम्भावना रहेको जानकारी दिएका छन् ।

यस्तै, प्रधानमन्त्री ओलीलाई मिर्गौला दान गर्ने भान्जा नता पर्ने समीक्षा संग्रौलाको पनि स्वास्थ्यस्थिति राम्रो भएको अस्पतालले जारी गरेको विज्ञप्तीमा जनाइएको छ ।