झापा – झापाको दक्षिणी क्षेत्र नेपाल–भारत सीमा कुमरखोदमा कोरोनाभाइरस (कोभिड–१९) भित्रन नदिन स्वास्थ्य सहायता कक्ष (हेल्थ डेक्स) स्थापना गरिएको छ ।

झापा गाउँपालिकाका उपाध्यक्ष कुन्तीदेवी बुढाथोकीले आइतबार सो कक्षको शुभारम्भ गर्दै भाइरसको जोखिम हुन नदिन सबै सचेत हुन र सरसफाइमा ध्यान दिन आग्रह गरिन् ।

गाउँपालिकाका स्वास्थ्य शाखा प्रमुख लक्ष्मण विश्वकर्माले कोरोनाभाइरसको जोखिम रोक्न स्वास्थ्य कक्ष स्थापना गरिएको जानकारी दिए ।

सो कक्षमा दुई स्वास्थ्यकर्मी परिचालन गरिएको छ । भारतले पनि डिगलबैंकमा स्वास्थ्य सहायता कक्ष स्थापना गरिसकेको जनाइएको छ ।

कोरोनाभाइरसबारे सचेतना फैलाउन दुवैतर्फका स्वास्थ्यकर्मीले अनुभव आदान–प्रदानसमेत गरेका छन् ।

उच्च ज्वरो, श्वासप्रश्वासमा कठिनाइ र रुघाखोकी देखिएकालाई अस्पताल पठाइने व्यवस्था मिलाइएको शाखा प्रमुख विश्वकर्माले जानकारी दिए ।