काभ्रे- काभ्रेको नमोबुद्ध नगरपालिका–२ बिपी राजमार्गअन्तर्गत सेल्फीडाँडा नजिक टिपर दुर्घटना हुँदा दुई जनाको मृत्यु भएको छ ।

जिल्ला प्रहरी कार्यालय काभ्रेपलाञ्चोकका प्रहरी नायब उपरीक्षक दीपक गिरीका अनुसार धुलिखेलबाट भकुण्डेबेसीतर्फ जाँदै गरेको वोल्ड वाईल्ड कन्ट्रक्सन प्रालि काठमाडौँको बा २ क ५ नम्बरको मिनी आइचर टिफर अनियन्त्रित भइ दुर्घटना भएको हो ।

दुर्घटनामा टिपरमा सवार दुवै जनाको घटनास्थलमा नै मृत्यु भएको उनले बताए । टिपर सडकबाट अन्दाजी २५० फिट तल खसेको छ । मुत्यु हुनेमा मकवानपुर जिल्ला टिस्टुङ पालुङ बस्ने अन्दाजी वर्ष २३ को चालक अस्बिन विष्ट र ललितपुर जिल्ला चुनीखेल बस्ने अन्दाजी वर्ष २२ को विशाल खड्का रहेका छन् ।

खड्का सडक विभाग वोल्ड वाईल्ड कन्ट्रक्सन प्रालि काठमाडौँको सुपर भाइजर रहेको प्रहरीले जनाएको छ । घटनाको बारेमा अनुसन्धान भइरहेको प्रहरीले जनाएको छ ।