काठमाडौं– नेपाल र अस्ट्रेलियाबीच हवाई सेवा संचालन गर्ने बारेमा छलफल भएको छ ।

विहीवार नेपाली दूतावास क्यानबेरामा अस्ट्रेलिया र नेपालबीच छलफल भएको हो । गत अक्टोबरमा दुई देशका बीचमा हवाई सम्झौता भएसंगै हवाई सेवाका लागि बाटो खुलेको थियो ।

हवाई सेवा सञ्चालन गर्ने विषयमा आज भएको छलफल सकारात्मक रहेको संस्कृति, पर्यटन तथा नागरिक उड्डयन मन्त्री योगेश भट्टराईले जानकारी दिए ।

छलफलमा नेपालका तर्फबाट मन्त्री योगेस भट्टराई, राजदूत महेश दाहाल, प्रथम सचिव द्रुपदा सापकोटा सहित निर्मल भट्टराई र यादव कोइराला सहभागि थिए भने अस्ट्रेलियाका तर्फबाट पूर्वाधार, यातायात सहरी तथा क्षेत्रीय विकास विभाग अन्तर्गतको नागरिक उड्डयनका महाप्रवन्धक जिम वल्फ, अन्तर्राष्ट्रिय एयर ट्रान्सपोर्ट, एभिएशन इन्ड्रस्ट्रि नीति शाखाका निर्देशन रोश एडम्सलगायतका प्रतिनिधिमण्डलबीच छलफल भएको थियो ।

अस्ट्रेलियामा एक लाख ५० हजार हाराहारी नेपाली बसोबास गर्दै आएका छन् । सिधा उडान नहुँदा उनीहरु र यहाँबाट नेपाल घुम्न जाने पर्यटक विभिन्न देशका विमानस्थलमा लामो ट्रान्जिटमा परेर आउन–जान बाध्य रहेका छन् ।