मेलबर्न – बिग बास लिग (बीबीएल) क्रिकेट टिम मेलबर्न स्टार्सले अष्ट्रेलियाका आगलागि पीडितलाई सहयोग गर्न नेपाली लेगस्पिनर सन्दीप लामिछानेको टिसर्ट अक्सनमा राखेको छ ।

अष्ट्रेलियामा जारी बिग बास लिगका क्रममा गत जनवरी २ मा मेलबर्न स्टासले सिड्नी थन्डरविरुद्ध खेलेको थियो ।

थन्डरविरुद्धको खेलमा मैदान उत्रिएका खेलाडीहरुको टि–शर्ट च्यारिटि अक्सनमा राखिएको स्टार्सले जनाएको छ ।

अक्सनमा राखिएको टिसर्टमा हरेक खेलाडीले आफ्नो हस्ताक्षर गर्नेछन् । त्यस्तै टिमका सबै सदस्यले हस्ताक्षर गरेको टिसर्टपनि अक्सनमा राख्ने मेलबर्न स्टार्सले जनाएको छ ।

यो समाचार तयार पार्दा सम्म सन्दीपको टिसर्टमा २२ जनाले खरिद गर्न इच्छा देखाइसकेका छन् ।

बोलकबोलका क्रममा टिसर्टको मुल्य ७ सय १० डलर पुगेको छ भने जनवरी ११ सम्ममा सबै भन्दा बढी बोलकबोल गर्नेले उनको टिसर्ट खरिद गर्नेछन् ।

त्यस्तै, सन्दीप लामिछानेले जनवरी ८ मा सिड्नी थन्डरविरुद्ध मैदानमा उत्रिने क्रममा आफ्नो जुत्ताको एकातिर ‘भिजिट नेपाल २०२०’ लेखेर नेपालको प्रचार गरेका थिए ।

‘बुसफायर हिरोज’ अर्कोतिर लेखेर अष्ट्रेलियामा जारी आगलागि पीडित प्रति सहानुभुति प्रकट गरेका छन् ।