काठमाडौं – डाक्टर सरोज कृष्ण श्रेष्ठले यदि कुनै खेलाडीमा कोरोना भाइरसको संक्रमण पुष्टि भए त्यो समय अवधिमा अभ्यास नगर्न सुझाव दिएका छन् ।

बिहीबार एलिट क्लब विराटनगरले आयोजना गरेको जुम भेलामा बोल्दै डाक्टर श्रेष्ठले यस्तो बताएका हुन् ।

डाक्टर श्रेष्ठले खेलाडीलाई कोरोना देखि कम्तिमा पनि १४ दिनको आइसोलेसन समयमा आराम गर्नुपर्ने बताएका छन् । कोरोना भाइरसले फोक्सो र मुटुमा असर गर्ने भएकाले जतिसक्दो सुरक्षित रहनुपर्ने उनको सुझाव छ ।

सुरक्षाका मापदण्ड अपनाउँदा अपनाउँदै कुनै खेलाडीलाई लागिहालेमा अभ्यास नगरी आराम गर्नु पर्ने डा श्रेष्ठ बताउँछन् ।

‘खेलाडीलाई कोरोनाको संक्रमण देखिए घरमा अभ्यास गर्न मिल्दैन । इमयुनिटीपावर बढाउने भन्दै अभ्यास गरे त्यसले पछिका लागि समस्या गर्ने अध्ययनले देखाएको छ,’ डाक्टर श्रेष्ठले भने ।

यस्तै, डाक्टर श्रेष्ठले राष्ट्रिय खेलकुद परिषद् (राखेप) ले मेडिकल एन्ड साइन्टीफीक कमिटी गठन गरेर यस कठिन परिस्थितिमा जुध्नुपर्ने बताएका छन् ।