काठमाडौँ– चिकित्सा शिक्षा सुधारका विभिन्न माग राख्दै अनसनरत डा गोविन्द केसीको माग सम्बोधनको विषयमा शिक्षा मन्त्रालयको टोली र डा केसीको तर्फबाट गठन भएको टोलीबीच वार्ता शुरु भएको छ ।

शिक्षा मन्त्रालयमा दुवै टोलीबीच डाक्टर केसीको मागको विषयमा छलफल शुरु भएको डाक्टर केसीका सहयोगी प्रितम सुवेदीले जानकारी दिए ।

वार्ता टोलीमा शिक्षा मन्त्रालयको तर्फबाट शिक्षासचिव गोपीनाथ मैनाली, गुणराज लोहनी, स्वास्थ्य मन्त्रालयका सहसचिव र चिकित्सा शिक्षा आयोग निर्देशक दिलिप शर्मा छन् भने डक्टर केसीको तर्फबाट डाक्टर जीवन क्षेत्री, डा. अञ्जनी कुमार झा, डा लोचन कार्की र अधिवक्ता ओम प्रकाश अर्याल छन् ।

विभिन्न जिल्लामा मेडिकल कलेज सञ्चालन हुनुपर्नेलगायत माग राख्दै भदौ २९ गतेदेखि डा केसी अनसनमा छन् । अनसनको २५ औँ दिन भइसकेको छ । डाक्टर केसीको स्वास्थ्य अवस्था पनि जटिल बन्दै गएको उनको निगरानीमा खटिएका चिकित्सकले बताएका छन् ।

डाक्टर केसीको माग प्रति सरकारले वास्ता नगरेको भन्दै नेपाल चिकित्सक संघलेदेखि आन्दोलनको घोषणा गरेपछि सरकारले बुधबार साँझ डा केसीसँग वार्ता गर्न वार्ता टोली गठन गरेको थियो ।