मोरङ- प्रदेश १ प्रहरी कार्यालय विराटनगर प्रमुख प्रहरी नायब महानिरीक्षक ईश्वरबाबु कार्कीलाई कोरोना भाइरसको संक्रमण पुष्टि भएको छ ।

विराटनगर महानगरपालिकाको जनस्वास्थ्य महाशाखाका मोहम्मद हैदर अलीले प्रदेश प्रहरी कार्यालयका ५ जना प्रहरी अधिकारीको प्रदेश जनस्वास्थ्य प्रयोशालामा गरिएको स्वाब परीक्षणमा प्रहरी नायव महानिरीक्षक ५२ वर्षीय कार्कीको रिपोर्ट पोजिटिभ आएको बताए ।

अन्यको रिपोर्ट नेगेटिभ आएको उनले जानकारी दिए ।

प्रदेश सरकारको सहयोगमा प्रदेश प्रहरी कार्यालयभित्र निर्माण गरिएको आइसोलेसन केन्द्रमा नै उनलाई राखिने स्वास्थ्य कार्यालय मोरङका प्रमुख ज्ञानबहादुर बस्नेतले बताए ।

प्रदेश १ मा हालसम्म ३ सय ५५ जना प्रहरीलाई कोरोना संक्रमण देखिएकोमा २ सय २० जना डिस्चार्ज भइसकेको सामाजिक विकास मन्त्रालयले जनाएको छ । प्रदेश १ मा मंगलबार ८० जना संक्रमित थपिएका छन् ।