मकवानपुर – कीर्ते कागजपत्र पेस गरी नेपाली नागरिकता लिएको आरोपमा प्रहरीले हेटौंडाका एक उद्योगीलाई पक्राउ गरेको छ ।

जिल्ला प्रहरी कार्यालय मकवानपुरका अनुसार जिल्ला प्रशासन कार्यालय रौतहटबाट ५९ वर्षीय विप्लपकान्ति बोस (विके)ले किर्ते कागजपत्र पेस गरी नेपाली नागरिकता लिएको आरोपमा पक्राउ गरिएको हो ।

जिल्ला प्रहरी कार्यालय मकवानपुरका डीएसपी इन्द्रबहादुर रानाका अनुसार विप्लपकान्तिलाई मंगलबार हेटौँडा, ५ गर्दोईबाट पक्राउ गरी रौतहट प्रहरीको जिम्मा लगाउने तयारी भइरहेको छ ।

जिल्ला प्रहरी कार्यालय रौतहटले पक्राउको लागि मकवानपुर प्रहरीलाई पत्र लेखेपछि इलाका प्रहरी कार्यालय पशुपतिनगरको टोलीले उनलाई पक्राउ गरेको हो ।

आरोपित विप्लपकान्ति बोसको नाममा हेटौंडा औद्योगिक क्षेत्रभित्र सुपर लेमिकोट्स प्रालि र हेटौंडा–५ गर्दोइमा नारायणी मिल्क छ ।