कास्की- गण्डकी प्रदेशमा थप २४ जनालाई कोरोना भाइरस संक्रमण पुष्टि भएको छ ।

गण्डकी स्वास्थ्य निर्देशनालयले पछिल्लो २४ घण्टामा गरेको परीक्षणबाट संक्रमण पुष्टि भएका २४ जनामध्ये २२ जना कुनै ट्राभल हिस्ट्री नभएको पाइएको छ ।

बाहिर ननिस्किएकै व्यक्तिमा कोरोना संक्रमण पुष्टि भएपछि यसको संक्रमण समुदायमा फैलिएको प्रमाणित भएको छ ।

प्रादेशिक स्वास्थ्य निर्देशनालयका अनुसार बागलुङमा १३ जना संक्रमित थपिएका छन् । उनीहरु सबै बागलुङ नगरपालिका–३ का पुरुष हुन् ।

स्याङ्जामा ७ जना संक्रमित थपिए । पुतलीबजारका ६ र कालीगण्डकीका एक जना छन् । कास्कीको पोखराका ३ र म्याग्दीका एक जनामा पनि संक्रमण पुष्टि भएको छ ।

यससँगै गण्डकी प्रदेशमा संक्रमितको संख्या १ हजार ६११ पुगेको छ । उनीहरुमध्ये एक हजार ४४३ जना निको भइसके ।