काठमाडौं-  कोरोना भाइरस संक्रमणमुक्त भई घर गएकाहरुमाथि भे‍द्‍भाव हुने गरेको भन्दै स्वास्थ्य मन्त्रालयले गम्भीर ध्यानाकर्षण भएको जनाएको छ ।

कोभिड-१९ बाट मुक्त भएर घर फर्किएकाहरूलाई गाउँघरमा भे‍दभाव हुने गरेको पाइएपछि स्वास्थ्य मन्त्रालयले यस्तो कार्य गर्नेलाई कारबाही गर्ने जनाएको छ।

स्वास्थ्य मन्त्रालयका प्रवक्ता प्रध्यापक डा. जागेश्वर गौतमले संक्रमणमुक्त भएका कतिपयलाई घरमा बस्न नदिइएको पाइएको बताए।

“निको भइसकेपछि घरमा जाँदा स्वागत गर्दै घरमा बस्ने व्यवस्था गर्नुपर्छ,” उनले भने, “यसो नगरी भे‍दभाव गरेको पाइए कानूनअनुसार कारबाही हुनेछ।”

यसैबीच मन्त्रालयले कोरोना परीक्षणका नाममा पालिकाबाट शुल्क लिने स्वास्थ्य विज्ञान प्रतिष्ठानलाई कारबाहीको चेतावनी दिएको छ ।

केही स्वास्थ्य विज्ञान प्रतिष्ठानले कोरोना परीक्षण गरेबापत शुल्क लिइरहेको खबर आएकोले त्यसतर्फ सरकारको ध्यानाकर्षण भएको मन्त्रालयले जनाएको हो ।

सरकारले प्रयोगशालाको सम्पूर्ण परीक्षण खर्च व्यहोर्ने भएकाेले पालिकाबाट पैसा नउठान आग्रह गरेको छ।