काठमाडौं – मनसुनी वायुको प्रभावसँगै अहिले विभिन्न ४ वटा प्रदेशमा वर्षा भइरहेको छ ।

जल तथा मौसम पूर्वानुमान महाशाखाका अनुसार अहिले सुदूरपश्चिम, गण्डकी, प्रदेश ५, प्रदेश २ को धनुषा, सिरहा तथा प्रदेश १ को विराटनगर आसपासको क्षेत्रमा बदली भइ हल्का वर्षा भइरहेको छ ।

मुलुकका विभिन्न भू-भागमा सामान्यदेखि पूर्ण बदली रही आज दिउँसो कर्णालीबाहेकका सबैजसो भू-भागका केही स्थानहरूमा भारी वर्षा हुने महाशाखाले जनाएको छ ।

भारी वर्षासँगै ती क्षेत्र    मा बाढी – पहिरोको जोखिम रहेको तथा बिभिन्न क्षेत्रका नदीहरूमा पानीको बहाव बढ्ने, भू-क्षय हुने, पहिरो जाने, सडक तथा हवाई यातायात प्रभावित हुने तथा ढल एवं पानीको राम्रो निकास नभएको ठाउँमा डुबानसमेत हुन सक्ने भएकोले आवश्यक सतर्कता अपनाउन महाशाखाले अनुरोध गरेको छ ।

 महाशाखाको पछिल्लो विवरणअनुसार दिपायलमा ३३.६ मिलिलिटर वर्षा भएको छ । यस्तै डडेल्धुरामा २९.५, धनगढीमा २५.५, वीरेन्द्रनगरमा १८.२, नेपालगञ्जमा २५.२, जुम्लामा ९.४, घोराहीमा ५.५, पोखरामा २.९, भैरहवामा २.६, काठमाडौँमा २.४, जोमसोममा १८.५, धरानमा ३.१, लुम्लेमा ८३.३ र जिरीमा २७ मिलिलिटर वर्षा भएको छ ।

नेपाल बाढी पूर्वानुमान महाशाखाले भने  कञ्चनपुरमा भारी वर्षापछि भीमदत्त नगरपालिकास्थित चौधर नदी लगायत कञ्चनपुर भई बहने स-साना नदीमा बाढी आउन सक्ने भएकाले विहान १० बजेसम्म सतर्कता अपनाउन आह्वान गरेको छ ।