काठमाडौं- भारतीय दुताबासको सहयोगमा नेपालका विभिन्न स्थानका ५६ वटा विद्यालय पुनर्निर्माण हुने भएको छ ।

भारतीय दुताबासले सोमबार विज्ञप्ति जारी गर्दै भूकम्पबाट क्षेतिग्रस्त भएका गोरखा, नुवाकोट, धादिङ, दोलखालगायतका जिल्लामा ५६ वटा विद्यालय पुनर्निर्माणका लागि २ अर्व ९५ करोड रुपैयाँ सहयोग गर्ने जनाएको हो ।

उच्च माध्यमिक विद्यालयको पुनर्निर्माणका लागि सोमबार भारतीय दूतावास र नेपाल सरकार शिक्षा मन्त्रालय अन्तर्गतको केन्द्रीय आयोजना कार्यान्वयन इकाइ बीच ७ वटा सम्झौतापत्रमा हस्ताक्षर भएको थियो ।

सम्झौता अनुसार, नेपाल सरकारले तोकेको मापदण्डमा भूकम्प प्रतिरोधि भवन निर्माण हुनेछन् । भूकम्प प्रतिरोधि संरचना पुनर्निर्माणको क्षेत्रमा भारतकै प्रमुख संस्थान केन्द्रीय भवन अनुसन्धान संस्थान, रुड्कीले विद्यालयहरुको पुनःनिर्माणको लागि प्राविधिक सहयोग गर्ने बताइएको छ ।