काठमाडौं– संघीय संसदमा बोल्दै युवा तथा खेलकुद मन्त्री जगत बहादुर विश्वकर्मा ‘सुनार’ले सासद प्रदिप यादवले आफुमाथि गम्भिर आरोप लगाएको भन्दै दुख व्यक्त गरेका छन् ।

जेठ १९ गते संघीय संसदमा बोल्दै सासद यादवले अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाको तराई लक्षित विवादास्पद अभिव्यक्तिमाथि टिप्पणी गर्दै एन्फाले मन्त्रीलाई माया गरेको बताएका थिए ।

उनले एन्फाले आगामि आर्थिक वर्षका लागि पोखरामा बहुउदेशीय एकेडेमी निर्माण गर्न १७ करोड विनियोजन गरेको विषयसँग मन्त्रीलाई जोड्दै भनेका थिए, ‘अहिले एन्फाले पनि मन्त्री ज्युलाई माया गर्न थालेको छ । उसले १७ करोडको प्रोजेक्ट मन्त्रीको क्षेत्रमा विनियोजन गरेको छ ।’

यस विषयले आफ्नो व्यक्तिगत चरित्र हत्या गरेको बताउँदै मन्त्रीले सोमबार संसदमा भने, ‘मन्त्रीलाई एन्फाले माया गरेको छ । १७ करोड एन्फाले दिएको छ भन्नुभयो । यो मैले भनेको होइन, उहाँले भन्नु भएको हो । यसको आशय के थियो ? सम्बन्धित व्यक्तिले स्पष्ट पार्नुपर्यो ।’

मन्त्रीले अगाडि थपे, ‘उहाँले जुन शब्द प्रयोग गर्नु भएको छ त्यहिँ हो भने यो विषय गम्भीर छ । उहाँले बोलेको कुरालाई पुष्टि गर्न चुनौति दिन्छु । मैले कसैबाट पनि पैसा लिएको छैन ।’

एन्फाले पोखरामा बनाउन लागेको प्रोजेक्टबारे आफुलाई जानकारी नभएको बताएका मन्त्रीले ‘एन्फाले एकेडेमी बनाउँन लागेको भन्ने सुन्नमा आएको छ । यो प्रशंग हो भने यसमा मेरो कमजोरी भएन नि !’

मन्त्री विश्वकर्माले आफ्नो निजी जीवनमा पनि असर गर्ने भएकाले संसदको रेकर्डबाट उक्त अडियो हटाउन माग समेत गरेका छन् ।