काठमाडौं – इङ्ग्ल्यान्ड र म्यान्चेस्टर सिटीका फरवार्ड रहिम स्ट्रलिङले अहिलेको परस्थितिमा सबैभन्दा खतरनाक रोग रंगभेद भएको बताएका छन् ।

बेलायतमा काला जातिको समर्थनमा भइरहेको आन्दोलनको पक्षमा बोल्दै उनले भने, ‘अहिलेको ठूलो रोग नै रंगभेद हो, जोसँग हामी लडिरहेका छौं।’

बेलायतमा हजारौं मानिसहरु ‘ब्ल्याक लाइभ्स म्याटर’ अभियानमा साथ दिँदै सडकमा आन्दोलन गरिरहेका छन् ।

यद्यपि त्यहाँको सरकारले कोरोना भाइरसको संक्रमण देखिनसक्ने भन्दै ठूलो संख्यामा भेला नहुन भनेको छ ।

‘अहिलेको समयमा यो महत्वपूर्ण क्षण हो, यो केही चिज जुन वर्षौदेखि समाजमा हुँदै आएको छ,’ २५ वर्षीय स्ट्रलिङले भने, ‘यो एक महामारी जस्तो छ जसको समाधान आवश्यक छ । अहिलेको समयमा सबै समर्थकहरु यो समस्याको समाधान खोजिरहेका छन् । अहिलेसम्म भएको अन्यायको अन्त्य हुनु पर्ने माग गरिरहेका छन् ।’

गएको मे २५ मा अमेरिकामा एक प्रहरीले अश्वेत नागरिक जर्ज फ्लोइडको घाँटी धिचि हत्या गरेको आरोपपछि अमेरिकाबाहिर पनि आन्दोलन भइरहेको छ ।