काठमाडौं- बैंक तथा वित्तीय निकायहरुले आज (शुक्रबार)बाट आफ्ना सबैखाले सेवा सञ्चालन गर्न थालेका छन् ।

सरकारले उद्योग, बैंकिङ तथा वित्तीय निकायलगायत बिभिन्न ४२ क्षेत्रलाई सेवा सञ्चालन गर्न अनुमति दिएपछि बैंक तथा वित्तीय संस्थाले आजबाट काम सुरु गरेका हुन् ।

बुधबार बसेको मन्त्रिपरिषद् बैंठकले बैंक तथा वित्तीय संस्था, बीमा धितोपत्र, सहकारी मार्फत सेवाप्रवाह गर्नका लागि आवश्यक कर्मचारीहरु मध्ये एक तिहाई कर्मचारीद्वारा सेवा सञ्चालन गर्न दिने निर्णय गरेको थियो। बैंकहरुले त्यसै बमोजिम सेवा प्रदान गर्न तयारी गरेको जनाएका छन्।

सरकारको निर्णयसँगै शुक्रबारबाट सेवा सञ्चालन गर्न तयार भएको बैंकर्स एसोसिएशन अफ नेपालका अध्यक्ष तथा सानिमा बैंकका सीइओ भुवन दाहालले बताए। बिहीबार सार्वजनिक बिदा भएकाले एकदिन ढिलागरी सेवा सञ्चालन गरिएको दाहालले बताए ।

सरकारको निर्णय अनुसार एकतिहाइ कर्मचारीबाट मात्रै काम सुरु हुने उनले बताए ।

नेपाल राष्ट्र बैंकले भने उच्च सावधानीका साथ काम गर्न निर्देशन दिएको छ। बैंकको नियमनकारी निकाय राष्ट्र बैंकले अहिले बैंकलाई आफ्नो सेवा सुचारु गर्न आफैमा कठिनाई रहेको र चुनौतीका बीच सावधानीपुर्वक संचालन गर्नुपर्ने बताएको हो।

राष्ट्र बैंकका कार्यकारी निर्देशक देवकुमार ढकालले उद्योग चल्ने बित्तिकै मुद्राको आवश्यकता र मुद्राको संचिति स्वतः बढ्ने बताए।