काठमाडौं – आईसीसी विश्वकप लिग २ मा अमेरिकाविरुद्ध ब्याटिङ गरिरहेको नेपालले कमजोर ब्याटिङ शुरुवात गरेको छ । कीर्तिपुरस्थित टियू क्रिकेट मैदानमा जारी खेलमा २६ ओभर ५ विकेट गुमाएर ९३ रन बनाएको छ ।

यसअघि नेपालले महत्वपूर्ण ४ विकेट गुमाइसकेको छ । जसमा कप्तान ज्ञानेन्द्र मल्ल, पारस खड्का, सुवास खकुरेल, आरिफ शेख र दीपेन्द्रसिंह ऐरी पवेलियन फर्किएका छन् ।

कप्तान मल्ल २१ रनमा खड्का १९ रनमा, सुवास ३ रनमा, आरिफ २ रनमा आउट हुँदा उपकप्तान ऐरी शून्यमै आउट भए ।

क्रिजमा रहेका कुसल मल्ल र विनोद भण्डारीले नेपालको ब्याटिङ माथि उकास्ने प्रयास गरिरहेका छन् ।

जसमा मल्लले २५ रनमा खेलिरहँदा विनोद भण्डारी ७ रनमा खेलिरहेका छन् ।

अमेरिकाले टस जितेपछि घरेलु टोलीविरुद्ध पहिलो फिल्डिङ रोजेको थियो । कसिलो बलिङ गरिरहेको अमेरिकाका लागि सौरभ नेत्रभाल्कर र क्यामरुन स्टेभेन्सनले समान २–२ विकेट लिए भने रस्टी थेरमले एक विकेट लिएका थिए ।

लिग २ आईसीसी विश्वकप क्रिकेट २०२३ को रोडम्याप समेत हो । लिग २ मा अमेरिका १२ अंकसहित शीर्ष स्थानमा छ भने घरेलु मैदानबाट शृङ्खला शूरु गरेको नेपालले अंक तालिकामा खाता खोल्न सकेको छैन् । शृङ्खलाको पहिलो खेलमा ओमानसँग पराजित भएको नेपाल आजको खेलमा जीतको खोजिमा रहेको छ ।