एजेन्सी- सर्वियन टेनिस सुपरस्टार नोभाक जोकोविच कारबाहीमा परेर यूएस ओपन टेनिस प्रतियोगिताबाट बाहिरिएका छन् ।

प्रतियोगिता अन्तर्गत आइतबार भएको खेलमा उनले प्रहार गरेको बल लाइन जजलाई लागेपछि उनी अयोग्य घोषित हुँदै प्रतियोगिताबाट बाहिरिएका हुन् ।

३३ बर्षीय सर्वियन खेलाडी जोकोविचले सर्भिस गुमाएपछि रिसाएर प्रहार गरेको बल लाइन जजलाई लागेपछि उनलाई अयोग्य घोषित गरिएको हो ।

उक्त बल लागेर महिला लाइन जज कोर्टमा नै ढलेकी थिइन् । अयोग्य घोषित भएसँगै यस वर्षको यूएस ओपन प्रतियोगिताबाट उनको यात्रा समाप्त भएको छ ।

उक्त घटना हुनुअघिसम्म खेलमा जोकोभिच ६-५ ले अगाडि थिए । प्रतियोगितामा कारवाही स्वरुप अयोग्य घोषणा गरिएपछि उनले हासिल गरेका सबै अंकहरु काटिएका छन् । जसका कारण उनले पाउनु पर्ने रकममा समेत कटौती हुने भएको छ ।