एजेन्सी- कोरोना भाइरसको महामारीले अनलाइन कक्षामात्र सञ्चालन भए अमेरिकामा रहने विदेशी विद्यार्थी समस्यामा पर्ने भएका छन् ।

अमेरिकाको इमिग्रेसन एण्ड कष्टम इन्फोर्समेन्ट (आईसीई) ले आगामी सेमेस्टरबाट निरन्तररूपमा अनलाइन कक्षा मात्र सहभागी भएमा अन्तर्राष्ट्रिय विद्यार्थीहरूले आफ्नो देश फर्कनु पर्ने जनाएको छ ।

अहिले कोभिड–१९ को महामारीको कारण अमेरिकामा रहेका अधिकांश विश्वविद्यालयहरूले अनलाइन कक्षाहरू सञ्चानल गर्दै आएका छन् ।

आईसीईका अनुसार अन्तर्राष्ट्रिय विद्यार्थीले अनलाइन कक्षामात्र लिएमा उनीहरूले विद्यार्थी भिसाको नियम उल्लङ्घन गरेको ठहरिनेछ ।

आईसीईको प्रावधानअनुसार अन्तर्राष्ट्रिय विद्यार्थीले प्रति सेमेस्टर तीनभन्दा बढी कक्षा अनलाइनमा लिन पाउँदैनन् । अहिले अमेरिकामा ११ लाखभन्दा बढी अन्तर्राष्ट्रिय विद्यार्थी विभिन्न विश्वविद्यालयहरूमा अध्ययनरत छन् ।

आईसीईको यो नयाँ नियमले अमेरिकामा अध्ययनरत १४ हजारभन्दा बढी नेपाली विद्यार्थीहरू प्रभावित हुनेछन् । अन्तर्राष्ट्रिय विद्यार्थीले अमेरिकाको अर्थतन्त्रमा ४५ बिलियन डलरभन्दा बढी योगदान गर्दै आएका छन् ।