विराटनगर- विराटनगरस्थित कोशी अस्पतालमा उपचाररत थप ८ जना कोरोना भाइरस मुक्त भएका छन् ।

दोस्रो र तेस्रो पटकको परीक्षणमा रिपोर्ट नेगेटिभ आएसँगै उनीहरुलाई भोलि (शुक्रबार) डिस्चार्ज गर्ने तयारी गरिएको हो ।

यसअघि प्रदेश १ कै ६ जना निको भएर अस्पतालबाट डिस्चार्ज भइसकेका छन् । यो सँगै प्रदेश १ मा कोरोना विरुद्धको संघर्ष जित्नेको संख्या १४ पुगेको छ ।

प्रदेश १ को मुख्यमन्त्री तथा मन्त्रिपरिषद्को कार्यालय कोरोना सूचना डेस्कले दिएको जानकारी अनुसार निको भएकाहरू भारतीय र नेपाली नागरिकहरू छन्। उनीहरू उदयपुरको त्रियुगा नगरपालिका-३ भुल्केबस्तीमा संक्रमित फेला परेकाहरु हुन् ।

भोलि ८ जना डिस्चार्ज भएपछि अस्पतालमा १७ जना रहने छन् । उनीहरु सबैको अवस्था सामान्य रहेको अस्पताल स्रोतले जानकारी दिएको छ ।