काठमाडौं– काठमाडौंको गौशालामा एउटा एम्बुलेन्सले निजी कारलाई ठक्कर दिएको छ । बिहीबार दिउँसो ३ बजेतिर मित्रपार्कबाट एयरपोर्टतर्फ जाँदै गरेको बा १० च ८५१३ नम्बरको निजी कारलाई विपरित दिशाबाट आउँदै गरेको बा ८ छ ६९२८ नम्बरको एम्बुलेन्सले ठक्कर दिएको हो ।

एम्बुलेन्सको ठक्करबाट कारका चालक काठमाडौंको गोंगबु बस्दै आएका २९ वर्षीय सविन श्रेष्ठ घाइते भएका छन् ।

प्रहरीले एम्बुलेन्स चालक मोरङको पथरी नगरपालिका घर भएका ३६ वर्षीय रामबहादुर चौधरीलाई नियन्त्रणमा लिएको छ ।

नियन्त्रणमा लिइएका एम्बुलेन्स चालक चौधरीले मादक पदार्थ सेवन गरेको पाइएको छ । साथै उनीसँग सवारी चालक अनुमतिपत्र (लाइसेन्स) समेत नभएको पाइएको महानगरीय प्रहरी बृत्त गौशालाले जनाएको छ ।

घाइते भएका निजी कारका चालकलाई उपचारका लागि अस्प्ताल लगिएको छ । पक्राउ परेका एम्बुलेन्स चालकमाथि थप अनुसन्धान भइरहेको प्रहरीको भनाइ छ ।