काठमाडौं– कोरोना भाइरसको आशंकामा ज्वरो नाप्न प्रयोग हुने थर्मल गनको कालोबजारी गरेको आरोपमा नेपालको व्यवसायिक घराना शंकर ग्रुपका सुलभ अग्रवाल पक्राउ परेका छन् ।

शंकर ग्रुप तथा जगदम्बा स्टिलका सञ्चालक सुलभलाई महानगरीय अपराध महाशाखाको टोलीले पक्राउ गरेको हो ।

३ हजार ५ सय रुपैयाँ बजार मूल्य रहेको एउटा थर्मल गन १६ हजार रुपैयाँमा बिक्री गरेको आरोपमा अग्रवाललाई पक्राउ गरिएको महानगरीय अपराध महाशाखाका प्रमुख एसएसपी सहकुल थापाले खबरहबलाई जानकारी दिए ।

प्रहरी स्रोतका अनुसार सुलभले थर्मल गनको प्रयोगका लागि कुटनीतिक नियोगका व्यक्तिले प्रयोग गर्ने (निलो नम्बर प्लेट)को गाडी प्रयोग गरेका थिए । उनले आफू नेपालका लागि किर्गिस्तानको अवैतानिक कन्सुलर भएको बताएका प्रहरी स्रोतले जानकारी दियो ।

प्रहरीले उनको गाडीबाट ६७ थान थर्मल गन समेत बरामद गरेको छ ।

प्रहरीका अनुसार केही दिन अगाडि नै अग्रवालले थर्मल गनको कालोबजारी गर्ने गरेको सूचना प्राप्त भएको थियो । सोहीअनुसार अपराध महाशाखाले आफ्ना केही प्रहरी कर्मचारीलाई व्यापारीको रुपमा अग्रवालसँग ‘डिल’ गर्न पठाएको थियो ।

‘हामीले व्यापारीको रुपमा डिल गर्दा उसले १६ हजार रुपैयाँ फाइनल प्राइज (अन्तिम मूल्य) भएको बतायो । तर, बजारमा थर्मल गनको मूल्य ३५ सय रुपैयाँ पर्छ,’ अपराध महाशाखाका एक अधिकारीले भने, ‘उनले विपदको समयमा अत्यावश्यक बस्तुको कालोबजारी गरिरहेको देखिएपछि हामीले पक्राउ गरेका हौं ।’