हेटौंडा– ‘दूध ढुवानी सेवा’ लेखेको स्टीकर टाँसी अटोमा रक्सी (मदिरा) तस्करी गर्ने १ जनालाई प्रहरीले पक्राउ गरेको छ ।

मंगलबार बिहान ६ बजेतिर हेटौंडा उपमहानगरपालिका– २ चौकीटोलमा चेकजाँचका क्रममा ना १ ह ५३८१ नम्बरको अटोलाई प्रहरीले रक्सीसहित नियन्त्रणमा लिएको हो । प्रहरीले अटोबाट करिब १ सय ४० लिटर मदिरा समेत बरामद गरेको छ ।

प्रहरीका अनुसार उक्त अटो बिहान समरीबाट हेटौंडातर्फ आउँदै गरेको थियो । अटोमा देखिने गरी दूधका खाली क्यानहरु राखी भित्रपट्टी गेलनमा मदिरा राखिएको थियो ।

सरकारले कोरोना भाइरस संक्रमणको जोखिक कम गर्न भन्दै जारी गरेको लकडाउनका बेला अत्यावश्यक वस्तुअन्तर्गत पर्ने दूधको ढुवानी भने रोकेको छैन ।

दूध ढुवानी गर्ने गाडीहरु स्थानीय प्रशासनबाट पास समेत नलिइ चल्ने पाउने भएका कारण मदिरा तस्करले अटोको अगाडि ‘दूध ढुवानी सेवा’ लेखिएको स्टीकर टाँसी मदिरा तस्करी गरेको जिल्ला प्रहरी कार्यालय मकवानपुरले जनाएको छ ।