बेइजिङ– चीनमा कोरोना भाइरसका संक्रमणको आशंका गरिएकाहरुलाई क्वारेन्टाइनमा राखिएको भवन भत्किएको छ । दक्षिणी चीनको फुजियान प्रान्तस्थित छाङ्झोउ शहरमा ५ तले भवन भत्किएको हो ।

स्थानीय समयअनुसार शनिबार बेलुकी ७ बजेतिर उक्त भवन भत्केको जनाइएको छ । स्थानीय अधिकारीले उक्त भवन भत्किने बेला त्यहाँ कोरोना भाइरसको संक्रमण रहेको आशंका गरिएका ७० जनालाई क्वारेन्टाइनमा राखिएको जनाएका छन् ।

उक्त भवन यसअघि होटेलेको रुपमा रहेपनि त्यस क्षेत्रमा कोरोना भाइरसको प्रकोप फैलिएसँगै त्यसलाई क्वारेन्टाइनस्थल बनाइएको हङकङबाट प्रकाशित हुने साउथ चाइना मर्निङ पोष्टले जनाएको छ ।

संकटकाल व्यवस्थापन निकायले भत्केको भवनबाट २८ जनाको उद्धार गरिएको जनाएका छन् । तीबाहेक अरु दर्जनौं भत्केको भवनको भग्नावशेषमा फसिरहेका छन् ।

भवन भत्किनुको कारणबारे तत्काल स्पष्ट विवरण सार्वजनिक भइसकेको छैन । प्रहरीले घटनाको अनुसन्धान अघि बढाएको जनाएको छ ।