विश्वभर स्मार्टफोन प्रयोगकर्तामध्ये अधिकांशले गुगलको एण्ड्रोइड अपरेटिङ सिस्टम भएका फोनहरु प्रयोग गर्दै आएका छन् । बेलाबेला एण्ड्रोइडमा सेक्युरिटीको अपडेट पनि आउने गरेको छ ।

तर, हालै गरिएको अध्ययनका अनुसार विश्वका एक अर्ब भन्दा धेरै एण्ड्रोइड स्मार्टफोन ह्याकिङको जोखिममा रहेको देखाएको छ ।

साइबर सुरक्षा फर्म ‘ह्विच?’ ले दाबी गरे अनुसार विश्वका एक अर्ब भन्दा धेरै स्मार्टफोनमा सेक्युरिटी अपडेटमा समस्या भएका कारण यस्ता फोनहरुमा ह्याकिङको खतरा बढेको छ ।

शोधका अनुसार सन् २०१२ वा त्यसअघि सार्वजनिक भएका स्मार्टफोन ह्याक हुने सम्भावना धेरै हुन्छ ।

यद्यपि यसबारे एण्ड्रोइड निर्माता कम्पनी गुगलले कुनै टिप्पणी गरेको छैन ।

मानिसहरुले खरिद गर्ने जस्तोसुकै स्मार्टफोनमा पनि कति समयसम्म सेक्युरिटी अपडेट हुन्छ भन्ने स्पष्ट हुँदैन । प्रायः स्मार्टफोनमा दुईदेखि तीन वर्षसम्म यस्तो अपडेट गर्न मिल्छ । त्यसपछि यस्तो अपडेट बन्द हुन्छ ।

गुगलका अनुसार अझै पनि एण्ड्रोइड प्रयोगकर्ताहरुमध्ये ४२ प्रतिशत प्रयोगकर्ताले एण्ड्रोइडको ६ वा यसभन्दा अघिको भर्सन प्रयोग गर्दै आएका छन् ।

हालै गरिएको शोधका अनुसार विश्वका ४० प्रतिशत एण्ड्रोइड स्मार्टफोनमा सेक्युरिटी अपडेट आउँदैनन् । सोही कारण यस्ता फोनहरु ह्याक हुने सम्भावना धेरै रहन्छ ।

उक्त शोधले गुगलसहितका एण्ड्रोइड स्मार्टफोन कम्पनीहरुले सफ्टवेयरबारे पारदर्शीता अपनाउनु पर्ने निष्कर्ष निकालेको छ ।