काठमाडौं– मिलेनियम च्यालेञ्ज कर्पोरेशन (एमसीसी)को युरोप, एशिया, प्रशान्त र ल्याटिन अमेरिकाका लागि सहायक उपाध्यक्ष जोनाथन ब्रुक्स चार दिने भ्रमणका क्रममा शुक्रबार काठमाडौं आएका छन् ।

अमेरिकी अनुदान सहयोगअन्तर्गत मिलेनियम च्यालेन्ज कर्पोरेशन (एमसीसी)सँग भएको सम्झौताका विषयमा नियमित परामर्शका लागि सहायक उपाध्यक्ष ब्रुक्स काठमाडौं आएका हुन् ।

काठमाडौंमा रहँदा उनले एमसीसी र मिलेनियम च्यालेञ्ज अकाउण्ट नेपाल (एमसीए नेपाल) पदाधिकारी, भौतिक पूर्वाधार तथा यातायात मन्त्री बसन्तकुमार नेम्बाङसहित सरकारी अधिकारीसँग भेटवार्ता गर्नेछन् ।

सन् २००४ मा स्थापित अमेरिकी सरकारको स्वतन्त्र निकाय एमसीसीले कठिन मापदण्ड पूरा गर्ने देशहरुलाई आर्थिक वृद्धिमार्फत् गरिबी न्यूनीकरण गर्नका लागि अनुदान दिँदै आएको छ ।

नेपाल र अमेरिकाबीच २०७४ भदौ महिनामा ५० करोड अमेरिकी डलरको अनुदान सहमतिमा हस्ताक्षार भएको थियो ।

एमसीसी परियोजना विशुद्ध रूपमा आर्थिक विकासमा केन्द्रित रहेको छ । विद्युत्‌को लाइन निर्माण र सडकको स्तरोन्नतिमार्फत आर्थिक विकासलाई सघाउने परियोजनाको लक्ष्य हो ।

अमेरिकी कानुनले कुनै पनि एमसीसी परियोजनामा सैन्य संलग्नतालाई निषेधित गरेको छ । नेपालले सहमति भइसकेका परियोजनाहरूमा उक्त रकम पारदर्शी रूपमा खर्च गर्नुपर्ने प्राबधान छ ।