वाशिंटन डिसी– अमेरिकी राष्ट्रपति डोनाल्ड ट्रम्पले यमनमा सक्रिय आतंकवादी संगठन अल कायदाका नेता मारिएको घोषणा गरेका छन् । राष्ट्रपति ट्रम्पले बिहीबार विज्ञप्ति जारी गर्दै ‘अरबी प्रायद्विपमा अल कायदा’ का नेता कसिम अल रायमी मारिएको घोषणा गरेका हुन् ।

उनले रायमीको नेतृत्वमा अल कायदाले यमनी जनता तथा अमेरिका एवं अमेरिकी फौजविरुद्ध ‘अकल्पनीय’ हिंसा मच्चाएको समेत उल्लेख गरेका छन् । उनले रायमी कुन अमेरिकी कारवाहीमा, कहाँ मारिएका भन्नेबारे केही उल्लेख गरेका छैनन् । यद्यपि पछिल्लो समय यमनको मरिब शहरनजिक अमेरिकी ड्रोन कारवाहीमा रायमीको ज्यान गएको अपुष्ट समाचार सार्वजनिक भएका थिए ।

रायमीको अन्त्यले यमन तथा विश्वभर नै अल कायदाको गतिविधिलाई कमजोर बनाउने र यस्ता समूहले अमेरिकी राष्ट्रिय सुरक्षामा पार्ने जोखिम घटाउने ट्रम्पको विश्वास छ ।

कुख्यात आतंककारी नेता ओसामा बिन लादेनले स्थापना गरेको अरबी प्रायद्विपमा अल कायदा विश्वव्यापी अल कायदा संगठनको सबैभन्दा घातक गुट मानिन्छ । अरबी प्रायद्विपमा अल कायदाले गृहयुद्धमा फसिरहेको यमनको व्यापक भूभागमा समेत नियन्त्रण जमाएको छ ।