काठमाडौं – विपिन कार्की स्टारर ‘सेल्फी किङ’ को अफिसियल ट्रेलर सार्वजनिक गरिएको छ । फिल्म युनिटले मंगलवार राजधानीमा आयोजना गरिएको कार्यक्रममा फिल्मको ट्रेलर सार्वजनिक गरेको हो ।

उक्त ट्रेलर युट्युबमा पनि हेर्न सकिन्छ ।

ट्रेलरमा विपिन कार्कीलाई शीर्ष भूमिकामा देख्न सकिन्छ । फिल्ममा विपिनले एक हास्यकलाकारको भूमिका निभाएको ट्रेलरबाट स्पष्ट हुन्छ ।

फिल्ममा विपिनका अलावा लक्ष्मी बर्देवा, जीवन पराजुली, भुवन चन्द, लोकमणि सापकोटा, कमल देवकोटा लगायतका कलाकारको अभिनय देख्न सकिन्छ ।

फिल्मलाई सुसन प्रजापतिले खिचेका हुन् भने जीवन थापाले सम्पादन गरेका हुन् ।

आउँदो माघ २४ गतेदेखि प्रदर्शनमा आउने फिल्मको केही समयअघि टिजर सार्वजनिक गरिएको थियो । यही फिल्मका कारण पछिल्लो समय विपिन चर्चामा छन् ।

दिनेश राउत र सुभाष थापाले निर्माण गरेको यो फिल्ममा विशाल सापकोटाको निर्देशन छ । यसअघि दिनेश र सुभाषले फिल्म ‘प्रसाद’ निर्माण गरेका थिए ।

‘सेल्फी किङ’ मा धेरथोर ‘प्रसाद’ को स्वाद भने पाउन सकिन्छ ।