काठमाडौं–  आईसीसी विश्वकप लिग–२ का लागि नेपाली क्रिकेट टोलीले पोखरामा बन्द प्रशिक्षण गर्ने भएको छ । नेपाल क्रिकेट संघ (क्यान) को सोमबार मुलपानीमा बसेको बैठकले राष्ट्रिय टोलीको बन्द प्रशिक्षण आगामी शुक्रबारदेखि पोखरामा शुरु गर्ने निर्णय गरेको छ ।

ओमान, अमेरिका र नेपालबीचको त्रिकोणात्मक सिरिज कीर्तिपुरस्थित त्रिभुवन विश्वविद्यालय क्रिकेट मैदानमा माघ २२ देखि २९ गतेसम्म हुनेछ ।

सोमबार बसेको क्यानको बैठकले राष्ट्रिय टोलीको बन्द प्रशिक्षण पोखरामा गर्ने, अभ्यासका क्रममा मलेसिया ११ टोलीसँग मैत्रिपूर्ण क्रिकेट खेल्ने लगायतका निर्णय गरेको क्यानका प्रवक्ता असोकनाथ प्याकुरेलले बताएका छन् ।

त्यस्तै क्यान बैठकले प्रदेश र जिल्लालाई पनि केही आर्थिक सहयोग गर्ने निर्णय गरेको छ । बैठकले प्रदेश क्यानलाई ३–३ लाख र सदस्य जिल्लाहरुलाई १–१ लाख रुपैयाँ दिने निर्णय गरेको सचिव प्रवक्ता प्याकुरेलले बताए ।

क्यान बैठकले दैनिक काम कारबाही गर्न कार्यसम्पादन समितिसमेत गठन गरिएको छ । जसमा अध्यक्ष चतुरबहादुर चन्द, उपाध्यक्ष राजबाबु श्रेष्ठ, सचिव असोकनाथ प्याकुरेल, कोषाध्यक्ष रोशन सिंह र एकजना सदस्य अमितबीर पाण्डे रहेका छन् ।