काठमाडौ– स्वास्थ्यमन्त्री भानुभक्त ढकाल होम क्वारेन्टिनमा बसेका छन् ।

मन्त्री ढकाल बस्दै आएको ललितपुरको हरिहरभवनस्थित मन्त्री क्वार्टरमा बस्दै आएका परिवारका एकजना सदस्यमा कोरोना संक्रमण पुष्टि भएपछि उनी होम क्वारेन्टिनमा बसेका हुन् ।

काठमाडौंमै एक संस्थामा जागिर गर्ने मन्त्री ढकालका परिवारका एक सदस्यमा ज्वरो आउने र जिउ दुख्ने समस्या देखिएपछि राष्ट्रिय जनस्वास्थ्य प्रयोगशालामा कोरोना परीक्षण गराएका थिए ।

उनमा तीनदिन अघि कोरोना पुष्टि भएपछि मन्त्री ढकाल पनि मन्त्रालय जान छाडेर तीनदिनअघि देखि क्वारेन्टिनमा बसिरहेको मन्त्री ढकालले खबरहबलाई बताए ।

‘तीनदिन देखि म होम क्वारेन्टिनमा छु,’ मन्त्री ढकालले खबरहबसँग भने, ‘काठमाडौंमै जागिर गर्ने एकजना परिवारका सदस्यलाई जीउ दुख्ने, ज्वरो आउने समस्या भएपछि कार्यालय जानुअघि कोरोना परीक्षण गरिएकोमा रिपोर्ट पोजेटिभ आयो । त्यसपछि हामी सबै क्वार्टरमै क्वारेन्टिनमा छौं ।’

मन्त्री ढकालका अनुसार कोरोना संक्रमण पुष्टि भएका उनका परिवारका सदस्यको अवस्था सामान्य रहेको र उनी पनि क्वार्टरमै होम आइसोलेसन बनाएर बसेका छन् ।

मन्त्री क्वार्टरमा अहिले मन्त्री ढकालकी पत्नी, दिदी, छोरा र एकजना भतिज समेत बस्दै आएका छन् ।

मन्त्री ढकालले चिकित्सकसँग परामर्श लिएर कन्ट्याक्ट ट्रेसिङको आधारमा ती सदस्यमा संक्रमण देखिएको ५ दिनपछि परिवारका सबैको कोरोना परीक्षण गराउने पनि जानकारी दिए ।