एजेन्सी – इंग्लिस क्लब म्यानचेस्टर युनाइटेड युरोपा लिगको क्वाटरफाइनलमा प्रवेश गरेको छ ।

घरेलु मैदानमा युनाइटेडले अष्ट्रियन क्लब लास्कलाई २–१ को पूनरागमन जीत निकाल्दै समग्रमा ७–१ को जीत निकाल्दै अन्तिम आठमा स्थान पक्का गरेको हो ।

युनाइटेडको जीतमा जेसे लिंगार्ड र एन्थोनी मार्सियलले गोल गरे । पाहुना टोलीका फिलिप वेइसिंगरले गरेको गोल सान्त्वना बन्यो । सबै तीन गोल दोस्रो हाफमा सम्भव भएको थियो ।

ओल्ड ट्राफोर्डमा बुधबार राति भएको खेलमा गोलको खाता खुल्न ५५ मिनेटसम्म कुर्न परेको थियो । ५५औं मिनेटमा फिलिपले गोल गर्दै लास्कलाई अग्रता दिलाए ।

तर, लास्कको त्यो अग्रता २ मिनेट पनि टिक्न सकेन । ५७औं मिनेटमा जेसे लिंगार्डले गोल गर्दै युनाइटेडलाई खेलमा १–१ गोलको अवस्थामा ल्याए । ८८औं मिनेटमा एन्थोनी मार्सियलले गोल गर्दै युनाइटेडलाई २–१ को जीत दिलाए ।