काठमाडौं- स्वास्थ्य तथा जनसंख्या मन्त्रालयले काठमाडौं उपत्यकाको तीनकुने र नख्खु क्षेत्रका २२८ जनाको स्वाब परीक्षण गर्दा कसैमा पनि कोरोना भाइरसको संक्रमण नभेटिएको जानकारी दिएको छ।

मन्त्रालयले काठमाडौंको समुदायस्तरमा कोरोना संक्रमण फैलिएको छ कि छैन भनेर परीक्षण गरिएकोमा ती दुई क्षेत्रका सबैको रिपोर्ट नेगेटिभ आएको हो ।

स्वास्थ्य मन्त्रालयका प्रवक्ता डा जागेश्वर गौतमले नियमित लाइभ अपडेटमार्फत काठमाडौंका विभिन्न १० ठाउँमध्ये २ ठाउँका स्थानीयको कोरोना परीक्षण गरिएको जानकारी दिएका हुन् ।

डा गौतमका अनुसार तिनकुने र नख्खु टोलका २२८ जनाको पीसीआर परीक्षण गर्दा सबैको रिपोर्ट नेगेटिभ आएको छ ।

‘काठमाडौं उपत्यकाको समुदायमा कोभिड १९ को संक्रमण फैलिएको छ कि छैन भनी विभिन्न ठाउँबाट स्वाब लिई परीक्षण गर्ने क्रममा १० ठाउँमध्ये तीनकुने र नख्खु टोलमा २२८ जनाको स्वाब संकलन गरी पीसीआर परीक्षण गर्दा सबैको नतिजा नेगेटिभ देखिएको छ,’ डा गौतमले भने, ‘अन्यको परीक्षणको रिपोर्ट आउने क्रम जारी छ ।’

काठमाडौंका विभिन्न क्षेत्रमा स्रोत नखुलेका संक्रमित भेटिन थालेपछि स्वास्थ्य मन्त्रालयले काठमाडौंमा समुदायमा संक्रमण छ वा छैन भनेर स्थानीयहरुको कोरोना परीक्षण गर्न शुरु गरेको जनाएको छ ।