काठमाडौं- पूर्व श्रम रोजगार तथा सामाजिक सुरक्षामन्त्री गोकर्ण विष्टले विदेशबाट कामदारको उद्धारमा रोजगारदातालाई नै जिम्मेवार बनाउनुपर्ने बताएका छन् ।

संसदमा शुरू भएको विनियोजन विधेयकमाथिको छलफलका क्रममा नेकपा सांसद विष्टले भने,‘अलपत्र कामदारलाई उद्धार गर्न रोजगारदाता र गन्तव्य देशलाई नै जिम्मेवारी बनाउनुपर्छ । यदि त्यो नभएमा मात्रै सरकारले देशभित्र ल्याउनुपर्छ ।’ उनले यो विषयलाई गम्भीरताका रुपमा लिनुपर्ने पनि बताए ।

वैदेशिक रोजगारीमा रहेको नेपाली कामदारलाई रोजगारदाताले नै सुरक्षित रुपमा स्वदेश फर्काउन सक्ने उनले बताए ।

कोरोनाका कारण झण्डै १६ लाख नेपाली बेरोजगार बन्ने अवस्था रहेको भन्दै उनले भने, ‘एकातिर नयाँ श्रम शक्तिको व्यवस्थापन र अर्कोतिर भइरहेको रोजगारबाट बाहिरिने संकट देखा परिरहेको छ । यसको व्यवस्थापन ज्यादै चुनौती भएकोले रोजगारी सिर्जनामा ध्यान दिनुपर्नेछ ।’

रोजगारी सिर्जना गर्न देशको आन्तरिक उत्पादनलाई संरक्षण गर्ने उनको भनाई छ ।