वीरगन्ज– आफ्नै घरलाई लागू औषध बिक्री गर्ने अड्डा बनाएका १ व्यक्तिसहित पर्सा प्रहरीले ५ जनालाई पक्राउ गरेको छ ।

जिल्ला प्रहरी कार्यालय पर्साले वीरगन्ज महानगरपालिका–३ बस्ने ४६ वर्षीय सन्तोष पटेलसहित ५ जनालाई पक्राउ गरेको हो । पक्राउ पर्नेमा उनकी श्रीमती ३७ वर्षीया बबिता देबी समेत छिन् ।

पक्राउ पर्ने अन्यमा वीरगन्ज–३ का २८ वर्षी टिँकु श्रीवास्तव, पर्साको बिन्दबासिनी गाउँपालिका–२ का २८ वर्षीय राजनाथ यादव र बाराको प्रसौनी गाउँपालिका–२ नौतन बस्ने ३२ वर्षीय मुग्रिम साह छन् ।

प्रहरीका अनुसार जिल्ला प्रहरी कार्यालय पर्साले वीरगन्ज महानगरपालिका–३ का सन्तोष पटेलले आफ्नो घर बाटै लागू औषधि बिक्री गर्दै आएका थिए । उनको कार्यमा श्रीमती बबिताले समेत सहयोग गर्दै आएका थिए ।

उनले विभिन्न समाजिक सञ्जालको प्रयोग गरी घरबाटै लागू औषध बिक्री गर्दै आएका थिए । कोरोना भाइरसको संक्रमण रोक्न जारी लकडाउनका अवधिमा समेत केही व्यक्ति लागू औषध कारोबारमा सक्रिय रहेको सूचनाका आधारमा प्रहरी सन्तोषसम्म पुग्न सफल भएको हो ।

प्रहरीले सन्तोषको घरबाट नियन्त्रित लागू औषध डायलेक्स–डीसी ८७ बोत्तल, आनेरेक्स १ सय ३ बोत्तल, निट्राजेपाम २० पिस, निट्राभेट ३६ पिस र सिम्प्लेस्ट ५८ पिस बरामद गरेको छ ।

उनले आफ्नो कोठामा रहेको बक्स पलङ भित्र लागू औषध लुकाएर राखेका थिए ।