काठमाडौं– प्रमुख प्रतिपक्षी दल नेपाली कांग्रेसले कोरोना भाइरसको महामारीले अर्थतन्त्रमा पारेको असर बारे अध्ययन, विश्लेषण तथा देशका लागि आवश्यक दृष्टिकोण निर्माण गर्न भन्दै ‘अर्थतन्त्र केन्द्रित बिशेष समिति’ गठन गरेको छ ।

पूर्वअर्थमन्त्री समेत रहेका कांग्रेस नेता डाक्टर रामशरण महतको नेतृत्वमा कांग्रेसले समित गठन गरेको हो । महत नेतृत्वको समितिमा ५ जना अर्थशास्त्रीहरु समेत सदस्यको रुपमा छन् ।

नेता महत संयोजक रहेको समितिमा कांग्रेस केन्द्रीय सदस्यहरु महेश आचार्य, ज्ञानेन्द्रबहादुर कार्की , डाक्टर नारायण खड्का, डाक्टर मिनेन्द्र रिजाल, चिनकाजी श्रेष्ठ रहेका छन् । त्यस्तै पूर्वराजदुत दिपकुमार उपाध्याय, संसदको लेखा समितिका सभापति भरत शाह, पूर्वअर्थराज्यमन्त्री तथा केन्द्रीय सदस्य उदय शमशेर राणा समेत रहेका छन् ।

समितिमा अर्थशास्त्रीहरु डाक्टर पृथ्वीराज लिगल, डाक्टर शंकर शर्मा, राष्ट्रिय योजना आयोगका पूर्वउपाध्यक्षहरु डाक्टर जगदीशचन्द्र पोख्रेल, डाक्टर गोविन्दराज पोख्रेल र डाक्टर स्वर्णिम वाग्ले समेत सदस्यका रुपमा रहेका छन् ।

समितिले तत्कालीन रुपमा अत्यावश्यक राहत बारे सुझाव, अल्पकालीन रुपमा आगामी बजेटको प्राथमिकता बारे धारणा र दीर्घकालीन रूपमा कोरोनापछिको अर्थतन्त्रबारे दुरगामी दृष्टिकोण निर्माण गर्ने कांग्रेसले जनाएको छ ।