काठमाडौं – नायिका वर्षा शिवाकोटीको आज जन्मदिन हो । लकडाउनका बेला जन्मदिन परेकाले उनलाई यो जन्मदिन स्मरणीय रहनेछ । उनका फ्यानले वर्षालाई जन्मदिनको शुभकामना दिइरहेका छन् ।

वर्षाको अभिनय रहेको फिल्म ‘लक्का जवान’ चैतमा रिलिज हुने भनिएको थियो । तर कोरोना भाइरसका कारण सरकारले हल बन्द गरेपछि फिल्मको प्रदर्शन स्थगित भयो ।

लकडाउनका कारण कलाकारहरू फुर्सदिला बनेपछि एकपछि अर्को कलाकार लाइभमा आएर फ्यानसँग गफिने गर्न थालेका छन् । यता नायिका वर्षा शिवाकोटी पनि आज (सोमवार) लाइभ आइन् । लाइभमार्फत उनले फ्यानसँग गफ गरिन् ।

सेल्फ क्वारेन्टाइनमा बसेकी वर्षाले फ्यानसँग बोल्न पाएको भन्दै खुशी व्यक्त गरिन् । साथै उनले आफ्नो साथी सर्कलमा जोडिएकाले सोधेको प्रश्नको उत्तर पनि दिइन् ।

फ्यानले कसरी दिन बिताइरहनुभएको छ भनेर सोधिरहेको प्रश्नमा वर्षाको काम र पुस्तक पढेर बिताएको बताइन् । उनले केही समयअघि मिचेल ओबामाको ‘बिकमिङ’ पढेकी थिइन् । उनले भनिन् – ‘पल्पसा क्याफे केही दिनअघि पढेर सकें, फ‌ूलानी पनि हिजो पढेर सकें, राम्रो लाग्यो ।’

‘पल्पसा क्याफे’ नारायण वाग्लेले लेखेको उपन्यास हो भने ‘फ‍‍ूलानी’ रंगकर्मी खगेन्द्र लामिछानेले लेखेको कथा सङ्ग्रह हो । वर्षाले भनिन् – ‘पल्पसा क्याफे’का बारेमा त मैले भन्नु नपर्ला । ‘फूलानी’मा पनि निकै राम्रा कथा रहेछन् ।

उनले सबैलाई पुस्तक पढ्ने बानी पार्न पनि आग्रह गरिन् । लकडाउनका बेला वर्षाले पढ्न चाहेका र पढ्न नपाएका पुस्तकको नाम बनाएको र पछि किन्ने पनि बताइन् ।