काठमाडौं- विश्वव्यापी महामारीको रुपमा फैलिएको कोरोना भाइरस संक्रमणकाे जोखिम रोक्न नेपालमा आइतबार राति दिपावली गरिएको छ ।

कोरोना भाइरसविरुद्धको लडाइँमा ऐक्यवद्धता जनाउन नेपालका प्रमुख शहरहरु आइतबार राति ९ बजे देखि ९ मिनेट सम्म बिजुली बत्ती बन्द गरेर दियो, मैनबत्ती, टर्च तथा मोवाइलको फ्लास बालिएको हो ।

नेपालसँगै भारतमा पनि दिपावली गरिएको छ । सर्वसाधारणले भारतीय प्रधानमन्त्री नरेन्द्र मोदीको आह्वानमा ऐक्यवद्धता जनाउँदै दिपावली गरेका हुन् ।

कोरोना भाइरसविरुद्धको लडाईंमा ऐक्यवद्धता जनाउनका बत्ती निभाएर दिप प्रज्वलन गर्न भारतीय प्रधानमन्त्री मोदीले देशबासीलाई अपिल गरेका थिए। त्यसै क्रममा नेपालमा पनि दिप प्रज्वलन गरिएको हो ।

मोदीको सोही अपिलप्रति समर्थन जनाउँदै नेपालसहित भारतभर ९ बजे देखि ९ मिनेट सम्म बिजुली बन्द गरेर दीप प्रज्वलन गरिएको हो।

प्रधानमन्त्री मोदीले यसकार्यबाट मानिसहरुमा जनचेतना फैलने र लकडाउनका कारण घरमा बसिरहेका मानिसहरुलाई एक्लोपन महशुस नहुने बताएका थिए।

यसैबीच, प्रधानमन्त्री माेदीले दिल्लीस्थित आफ्नाे निवासमा दीप प्रज्वलन गरेर सबैलाई धन्यवाद दिए ।

भारतमा यतिबेला २१ दिन लामो लकडाउन चलिरहेको छ। आज लकडाउनको १३ औँ दिन हो। यस्तै नेपालमा पनि लकडाउनको १४ औं दिन भएको छ ।

कोरोना भाइरसको प्रकोप भारतमा दिन प्रतिदिन बढ्दै गइरहेको छ। हालसम्म भारतमा कोरोनाको संक्रमणबाट ११७ जनाको ज्यान गएको छ ।