काठमाडौं – भोजपुरी फिल्म उद्योगमा समेत हिट फिल्म दिएर नेपाली फिल्म उद्योगमा कमब्याक भएका विराज भट्टको फिल्म ‘साङ्लो’ लाई मल्टिप्लेक्स हलले कम शो दिएका छन् ।

भोलि शुक्रवारदेखि नेपालभर प्रदर्शन हुन लागेको यो फिल्मले सिङ्गल थिएटरमा आक्रामक व्यापार गर्ने अनुमान गरिए पनि मल्टिप्लेक्स हलमा भने शो नै कम पाएको हो ।

जबकि, नेपालमा पछिल्लो समय बढी व्यापार हुने नै मल्टिप्लेक्स हलमा हो ।

विराज भट्टले निर्देशन गरेको फिल्म ‘साङ्लो’ मा भट्टकै शीर्ष भूमिका छ भने निकिता चाण्डकले पनि मुख्य भूमिका निभाएकी छिन् । एक्सन प्याक फिल्म भनिएको हललाई मल्टिप्लेक्स हलमा खासै शो दिइएको छैन । विदेशी एक्सन फिल्मले भने नेपालका हलमा पर्याप्त शो पाउने गरेका छन् ।

मल्टिप्लेक्सको ठूलो चेन भएको हल क्युएफएक्सले फिल्म ‘सेल्फी किङ’ लाई शुक्रवार मात्र नेपालभर ३५ शो दिएको छ । यस्तै फिल्मले राजधानीमा मात्र शुक्रवारलाई २० शो पाएको छ ।

विराजको ‘साङ्लो’ ले भने क्युएफएक्स चेनमा जम्मा ११ शो पाएको छ । त्योमध्ये राजधानीमा ४ शो दिएको छ ।

नेपालमा अन्य मल्टिप्लेक्स हलमा पनि ‘सेल्फी किङ’ लाई पर्याप्त शो दिइएको छ भने ‘साङ्लो’ लाई एक या दुई शो मा सीमित गरिएको छ ।

भोलि शुक्रवारदेखि प्रदर्शनमा आउने फिल्म ‘साङ्लो’ र ‘सेल्फी किङ’ दुवैको चर्चा छ । फिल्म ‘सेल्फी किङ’ ले बुधवार प्रिमियर शो राखेको थियो । फिल्म हेरेर सेलिब्रेटीले मन परेको प्रतिक्रिया दिएका थिए ।