बुटवल– विपक्षी दलले अवरोध गरेपछि २ बजेसम्मका लागि स्थगित भएको प्रदेश ५ को प्रदेश सभा बैठक अझै सुरु भएको छैन ।

साढे १ बजे बैठक सुरु हुनासाथ विपक्षी दल नेपाली कांग्रेस संसदीय दलका नेता वीरेन्द्र कनौडिया सभामुखसँग समय मागेर बोलेका थिए । उनले सरकारले विपक्षी दलहरूसँग सल्लाह नगरेको र जनभावना विपरीत राजधानीसम्बन्धी प्रस्ताव पेश गरेको आरोप लगाउँदै बैठक अवरुद्ध गराउने बताए ।

उनले बोलिसकेपछि नेपाली कांग्रेस र जनता समाजवादी पार्टीका सांसदहरू आआफ्नो आशनबाट उठेका थिए । उनीहरुले नाराबाजी पनि गरेका थिए । बैठक अवरुद्ध भएपछि सभामुख पूर्णबहादुर घर्तीले २ बजे बस्ने गरी बैठक स्थगित गरेका थिए ।

प्रदेश ५ सरकारले दाङको देउखुरी उपत्यकामा राजधानी बनाउने प्रस्ताव पेश गरेपछि विपक्षी दलहरूले विरोध जनाएका छन् । सत्तारुढ दलभित्रै पनि असन्तुष्टि चर्केको छ ।