ललितपुर- ललितपुरको अल्का अस्पतालमा कार्यरत एक महिला मृत फेला परेकी छन् ।

शुक्रवार साँझ अस्पतालकी कर्मचारी ३९ वर्षीय गीता केसीको शव गोदावरी नगरपालिका १० स्थित मुलडोलस्थित लेलेको जंगलमा फेला परेको प्रहरीले जानकारी दिएको छ। महानगरीय प्रहरी परिसर ललितपुरका एसएसपी टेकप्रसाद राईका अनुसार उनको शव जंगलमा फेला परेको छ। घटनाका विषयमा अनुसन्धान भइरहेको उनले बताए ।

भैंसेपाटीमा बस्दै आएकी गीता घरबाट हराएपछि परिवारले प्रहरीमा उजुरी दिएका थिए। उनी चार दिनदेखि बेपत्ता थिइन्।

घटनाको अनुसन्धानको क्रममा प्रहरीले एक युवकलाई पनि नियन्त्रणमा लिएको छ।

ती युवक महिलाको आफन्त पर्ने प्रहरी अनुसन्धानमा खुलेको छ। महिलाको शव पोस्टमार्टमका लागि पाटन अस्पताल पठाइएको प्रहरीले जनाएको छ।