एजेन्सी – चीनको सिन्जियाङमा गैरकानूनीरूपमा राखिएका मुस्लिम अल्पसंख्यक उइगर समुदायका एक मोडलले एउटा भिडियो सार्वजनिक गर्दै आफू बाँच्ने अन्तिम आशामा रहेको बताएका छन् ।

सिन्जियाङ गैरकानूनीरूपमा राखिएको हिरासतबाट १० वर्षअघि बल्लतल्ल फुत्किएका मुस्लिम अल्पसंख्यक उइगर समुदायका ३१ वर्षीय घापरलाई फेरि हिरासतमै राखिएपछि त्यहाँभित्र हुने यातनालाई उनले भिडियोमार्फत सार्वजनिक गर्दै आफू बाँच्ने अन्तिम कोसिसमा रहेको बताएका हुन् ।

बीबीसीले प्राप्त गरेको उक्त भिडियोमा घापरले कोरोना भाइरसको महामारी फैलिएको सात महिना वित्दा पनि त्यसबारे कुनै जानकारी नदिइएको तथा फोहोरमा असुरक्षित भएर बस्न बाध्य भएको बताएका छन् ।

हिरासत कक्षमै रहेका घापरले उच्च सावधानिकासाथ गोप्यरूपमा बीबीसीलाई पठाएको उक्त भिडियोमा चीनले तीन खराब शक्तिविरुद्ध लडिरहेको भनिएको अतिवादी, आतंकवादी र पृथकतावादीको विषयमा उल्लेख गरिएको छ ।

हिरासतमा रहेकाहरुलाई यातना र दुर्व्यवहार गर्ने गरिएको तथा गम्भीर मनोवैज्ञानिक दबाब दिने गरिएको विषय उक्त भिडियोमा पाइएको बीबीसीले जनाएको छ । हिरासतमा रहेकाहरूलाई परिवारको सम्पर्कमा पुग्नै नदिइएको तथा घापर स्वयंम पनि पाँच महिनादेखि परिवारसँग सम्पर्कबिहिन भएको भिडियोमा दाबी गरिएको छ ।

३८ मिनेटको उक्त भिडियोमा उनले भोगेको यातनाको बारेमा जानकारी गराइएको छ ।  उनले यो आफ्नो अन्तिम आशा भएको पनि बताएका छन् ।

सन् २००९ मा उइगर भएकै कारण यातना भोगेपछि उनले सिन्जियाङ छोडेका थिए । तर, चिनियाँ अधिकारीहरुले फेरि उनलाई त्यही उइगर रहेको हिरासतमा थुनेको बताइएको छ ।

केही वर्षयतादेखि पश्‍चिमी प्रान्त सिन्जियाङका करिब १० लाख उइगर र अल्पसंख्यकहरु चीनको हिसासतमा रहेको बताइन्छ । चीनले उनीहरुलाई अतिवादविरुद्ध प्रशिक्षण दिइरहेको बताउँदै आएको छ ।

यसै कारणहजारौं बालबालिकालाई उनीहरुको अभिभावकबाट अलग गराइएको छ भने महिलाहरुलाई जबरजस्ती बच्चा नजन्माउन दबाब दिदै आएको अन्तर्राष्ट्रिय सञ्चारमाध्यमहरूले दाबी गर्दै आएका छन्।

उइगर समुदायको मानव अधिकार हनन गरिएको भन्दै अमेरिका, बेलायत लगायतका मुलुकले चीनको चर्को आलोचना गर्दै आएका छन् भने यसै मामिलाई लिएर चीनविरूद्ध अन्तर्राष्ट्रिय अदालतमा मुद्दासमेत परिसकेको छ ।